Isroil Shvetsiyada Tavrotni yoqishga ruxsat berilganini qoralab chiqdi

Isroil Shvetsiyadagi Isroil elchixonasi oldida Tavrotni yoqib yuborishga urinishni keskin qoralab, Stokgolmni “nafrat harakati”ning oldini olishga chaqirdi. Bu haqda Isroil Tashqi ishlar vazirligi matbuot kotibi Lior Hayat o‘zining Twitter’dagi sahifasida ma’lum qildi.

Avvalroq Shvetsiya rasmiylari Shabbat kuni Isroil elchixonasi yonida Tavrot va Injilni yoqib yubormoqchi bo‘lgan erkakning so‘rovini ma’qullagani ma’lum qilingandi.

“Isroil Shvetsiyadagi Isroil elchixonasi oldida Tavrotni yoqish niyatini keskin qoralaydi. Muqaddas kitoblarni yoqish nafrat va murosasizlikdir va so‘z erkinligiga hech qanday aloqasi yo‘q. Shvetsiya rasmiylarini muqaddas kitoblarni yoqishning oldini olishga chaqiramiz”, — deb yozdi diplomat.

O‘z navbatida, Isroilning Shvetsiyadagi elchisi Ziv Nevo Kulman ham Tavrotni yoqishga ruxsat berilishini qoraladi.

12-iyul kini BMTning Inson huquqlari kengashi Qur’on va boshqa muqaddas kitoblarni yoqib yuborishni qoralovchi rezolyutsiya qabul qilgandi.