Janubiy Koreyada kuchli yomg‘irlar oqibatida jabrlanganlar orasida O‘zbekiston fuqarolari yo‘qligi ma’lum qilindi
Janubiy Koreyada kuchli yomg‘irlar oqibatida halok bo‘lganlar va jabrlanganlar orasida O‘zbekiston fuqarolari yo‘q. Bu haqda “Dunyo” AA xabar berdi.
O‘zbekistonning Seuldagi elchixonasi xabariga ko‘ra, vaziyat o‘zbek diplomatlari nazoratiga olingan.
Janubiy Koreyada o‘tgan haftadan beri kuchli yomg‘irlar davom etmoqda. Koreya meteorologiya boshqarmasi ma’lumotlariga ko‘ra, seshanba kunidan hozirgi kunga qadar bir qancha hududlarda 470 millimetrdan ortiq yomg‘ir yog‘gan.
Yonhap agentligi bergan so‘nggi ma’lumotlarga ko‘ra, kuchli yomg‘ir tufayli yuzaga kelgan suv toshqinlari va ko‘chkilar qurbonlari soni 32 kishiga yetdi, yana 10 kishi bedarak yo‘qolgan.
Meteorologlarning prognozlariga ko‘ra, bir qator markaziy va janubiy viloyatlarda yomg‘ir seshanba kuniga qadar davom etadi. Mutaxassislarning ogohlantirishicha, bu hududlarda 300 millimetrgacha qo‘shimcha yog‘ingarchilik yog‘ishi mumkin.
