Tayvandagi yarmarkada yuz bergan portlashda 17 kishi jarohat oldi

Tayvan janubidagi Chiayi shahridagi ibodatxona yarmarkasida portlash yuz berdi, deb xabar berdi "Ziyu Shibao" gazetasi.

Oqibatda 17 kishi, jumladan, uch nafar bola jarohatlangan. Ular kasalxonaga yotqizilgan. Keyinroq gazeta jabrlanganlar soni 28 nafarga yetganini xabar qildi.

Gazetaning yozishicha, portlash 16-iyulga o‘tar kechasi sodir bo‘lgan, yarmarkada 20 mingga yaqin odam bo‘lgan. Guvohlar sahna yaqinidagi chiqindi qutisida portlash ovozini eshitishgan. Yarmarka tashkilotchilari ushbu hududda pirotexnika vositalari bo‘lganini ta’kidlashdi.

Yana bir versiya — elektr generatorlaridan birining portlashi. O‘t o‘chirish bo‘limi gaz portlaganini ma'lum qildi. Huquq-tartibot idoralari hodisa sabablarini o‘rganmoqda.