Yirik hajmdagi uzilishlarning oldini oladi — Energetika vazirligi qisqa muddatga elektr energiyasi uzib qo‘yilayotgani haqida
Energetika vazirligi O‘zbekistonda kuz-qish mavsumiga puxta tayyorgarlik ko‘rish maqsadida olib borilayotgan ta’mirlash ishlari vaqtida elektr energiyasi qisqa muddatga uzib qo‘yilayotganini to‘g‘ri tushunishni so‘radi.
Maʼlumki, shu kunlarda elektr energiyasi ishlab chiqaruvchi stansiyalar, elektr uzatish tarmoqlari, podstansiyalar va transformator punktlarida joriy hamda mukammal taʼmirlash ishlari amalga oshirilmoqda. Mazkur taʼmirlash ishlari jarayonida ayrim hududlardagi elektr tarmoqlari vaqtincha tarmoqdan ajratib turiladi va ana shu jarayonda taʼmirlash ishlari olib borilayotgan tarmoqlar orqali taʼminlanuvchi isteʼmolchilarning elektr taʼminotida uzilishlar kuzatiladi.
“Isteʼmolchilardan tarmoqda keng ko‘lamli nosozliklar yuzaga kelishining oldini oladigan, keyinchalik vaziyatni ancha uzoqroq tuzatishni talab qiladigan holgacha yetib bormaslik uchun qisqa muddatga elektr energiyasini uzib turishga to‘g‘ri keladigan bunday zaruriy choralar bugun o‘ta muhim ekanligini tushunishlarini va qo‘llab-quvvatlashlarini so‘raymiz”, — deyiladi vazirlik xabarida.
Ta’kidlanishicha, havo haroratining keskin isishi natijasida elektr qurilmalarining haddan tashqari qizishi hamda isteʼmolning ortishi energotizimda katta hajmdagi avariyaviy o‘chishlarga olib kelishi mumkin. Bu esa elektr taʼminotini yaxshilash uchun muayyan vaqt (bir kun yoki undan ko‘proq) talab etishi mumkin.
Asosan, ochiq quyoshda joylashgan elektr tarmoqlari bugungi anomal issiq sharoitda ularning ishlashi uchun mo‘ljallanmagan haroratgacha qiziydi. Bundan tashqari, ayniqsa, kunduz kunlari elektr uzatish tarmoqlarining nosoz holatga kelishiga elektr energiyasi isteʼmolining favqulodda o‘sishi ham taʼsir qilmoqda.
“Oddiy aytganda, o‘zi oftobning tig‘i ostida tashqaridan qiziy boshlagan kabel yuklamaning ortishi, son-sanoqsiz konditsionerlar, muzlatkichlar, sovitkichlar, boylerlar va boshqa elektr texnika jihozlarining bir vaqtda tarmoqqa ulanishi tufayli ichidan ham qizib, asta-sekin tutay boshlaydi.
Ana shu vaziyatda energotizimda keng ko‘lamli muammolar yuzaga kelishining oldini olish uchun dispetcherlik xizmatlari elektr uzatish tarmoqlaridagi yuklamani kamaytirish maqsadida zarur choralar ko‘radi. Masalan, maʼlum ko‘rsatkichlar kritik (og‘ir) darajaga yaqin bo‘lgan hollarda, ayrim turar joy binolari va sanoat obyektlari elektr taʼminotidan vaqtincha uzib turiladi”, — deya tushuntirish berilgan vazirlik xabarida.
Qayd etilishicha, elektr tarmoqlaridagi favqulodda holatlarning oldini olish va ularni bartaraf etish maqsadida hududlar bo‘ylab tun-u kun ishlaydigan avariyaga qarshi maxsus brigadalar tashkil etilgan. Ular yuzaga kelgan nosozliklarni zudlik bilan bartaraf etib bormoqda.
