Putin oktabrda Xitoyga boradi. U Si Szinpin bilan nimani muhokama qiladi?
Rossiya prezidenti Vladimir Putin oktabr oyida Xitoyga tashrif buyurishi mumkin. Uning xalqaro masalalar bo‘yicha yordamchisi Yuriy Ushakov bu haqda ma’lumot berdi.
Putin Xitoyga tashrif taklifini olgan, u “Bir makon, bir yo‘l” forumi bo‘lib o‘tadigan vaqtda Pekinga bormoqchi.
“Maʼlumki, biz taklifnoma olganmiz va ‘Bir makon, bir yo‘l’ forumi doirasida Xitoyga borish niyatidamiz”, — dedi Ushakov.
12-iyul kuni Rossiya prezidenti matbuot kotibi Dmitriy Peskov hozir Xitoy bilan ikki tomonlama munosabatlarni rivojlantirish uchun mutlaqo qulay davr ekanini aytgandi.
Shu tariqa u Xitoy rahbari Si Szinpin rossiyalik hamkasbining Pekinga tashrifini kutayotgani haqidagi so‘zlariga izoh bergan.
Peskov tashrif davomida kun tartibidagi mavzulardan biri ikki tomonlama savdo-iqtisodiy hamkorlik bo‘lishini ma’lum qilgan. Moskva va Pekin joriy geosiyosiy vaziyat yuzasidan ham fikr almashadi.
Birinchi prezidentlik muddati boshlanganidan beri Putin Xitoyga 17 marta tashrif buyurgan. Uning so‘nggi tashrifi 2022-yil 4-fevralda bo‘lib o‘tgan. U Pekindagi Qishki Olimpiya o‘yinlarining ochilishida ishtirok etgan.
Xitoy rahbari Si Szinpin Rossiyaga oxirgi marta 2023-yil 20-martda kelgandi. Putin va Si Szinpinning 4 soatdan ortiq davom etgan norasmiy muzokaralarida Xitoy rahbari rossiyaliklar 2024-yilgi prezidentlik saylovlarida Putin nomzodini qo‘llab-quvvatlashiga ishonch bildirgan.
