AQSH mudofaaga rekord darajada mablag‘ ajratmoqda
AQSH Senati 2024-yil uchun rekord darajadagi 886 milliard dollarlik milliy mudofaani moliyalashtirish to‘g‘risidagi qonunni ma’qulladi. Bu haqda Amerika ovozi xabar berdi.
Qonun ma’qullangach, Kongressning har ikki palatasi murosa topishi va hujjat versiyasini kelishib olishi kerak.
“Ushbu qonun loyihasi Xitoy va Rossiya kabi raqiblarga qarshi raqobatimizni birinchi o‘ringa qo‘yish uchun eng katta imkoniyatdir. Bu bizning Bayden ma’muriyati diqqatini Amerikaning harbiy-sanoat bazasini tiklash kabi muhim masalalarga qaratishimiz uchun imkoniyat”, — dedi Senatdagi ozchilik rahbari Mitch MakKonnell.
Qonun loyihasi, shuningdek, Ukraina uchun 300 million dollar ajratish va bir qancha muhim bandlarni o‘z ichiga oladi, masalan, sun’iy intellekt va yarimo‘tkazgichlar kabi Xitoyning ayrim korxonalariga AQSH sarmoyasini cheklash va harbiylarning maoshlarini 5,2 foizga oshirish.
Shu bilan birga, Senat ikki partiya tomonidan qo‘llab-quvvatlangan bir nechta takliflarni rad etdi. Ular qatoridan demokrat senator Emi Klobucharning “Tolibon” hukmronligidan so‘ng AQSHga ko‘chib kelgan 80 ming afg‘onga yashash ruxsatnoma taqdim etish joy olgan.
Bundan tashqari respublikachilarning Ukrainaga yordam ko‘rsatish bo‘yicha bosh inspektor lavozimini yaratishga urinishi ma’qullanmagan. Yordam berish bilan shug‘ullanadigan inspektorlarning lavozimlari allaqachon ma’lum davlat idoralarida mavjud.
