“Doksuri” to‘foni Xitoyga 420 million dollar zarar keltirdi

“Doksuri” to‘foni Xitoy sharqidagi Futszyan provinsiyasiga kamida 3 milliard yuan (taxminan 420 million dollar) zarar keltirdi. To‘fon natijasida hukumat 363 ming kishini evakuatsiya qilgan. Bu haqda China Daily nashri xabar bermoqda.

Uning so‘zlariga ko‘ra, halokat zonasida 1,5 millionga yaqin odam bor. Dastlabki hisob-kitoblarga ko‘ra, 10 ming gektardan ortiq qishloq xo‘jaligi yerlari zarar ko‘rgan. 90 ta bino butunlay vayron bo‘lgan, yana 5 mingga yaqin bino shikastlangan.

Aholini qutqarish uchun hukumat 21 mingga yaqin odamni, shu jumladan, 5 mingdan ortiq harbiy xizmatchini safarbar qildi.

Bundan tashqari, tayfun oqibatlarini bartaraf etishga qariyb 130 ming kishi jalb etilgan: elektr uzatish liniyalari va aloqa tarmoqlarini tiklash, yo‘llarni tozalash, suv toshqinlarining oldini olish bo‘yicha ishlar olib borilmoqda.