Namanganda tuman soliq inspeksiyasi bosh inspektori pora bilan qo‘lga tushdi (video)
Davlat xavfsizlik xizmati xodimlari tomonidan o‘tkazilgan tezkor tadbirda Namangan viloyati Davlatobod tumani davlat soliq inspeksiyasi bosh inspektori pora bilan ushlandi.
U mas’uliyati cheklangan jamiyatning moliyaviy faoliyati yuzasidan o‘tkazilgan kameral soliq tekshiruvi natijasida MCHJga 383 million so‘mlik foyda solig‘i qo‘shimcha hisoblangani va ushbu pul mablag‘i MCHJ tomonidan to‘lanishi kerakligini aytgan.
Lekin u soliq hisobotlariga o‘zgartirishlar kiritish orqali ushbu summani bartaraf etib berish evaziga MCHJ vakilidan 3 ming dollar olgan vaqtida DXX xodimlari tomonidan ushlangan.
DXXning Andijon viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda o‘tkazilgan tezkor tadbirda Milliy gvardiyaning Andijon viloyati qo‘riqlash boshqarmasi Andijon tuman bo‘limi safdor xodimi yuqori lavozimda ishlovchi hamkasblari orqali fuqaroni Milliy gvardiya tizimiga harbiy xizmatchi sifatida ishga kiritib qo‘yish evaziga 5 ming dollar olgan vaqtida ushlangan.
Hozirda ushbu holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
