Iroqlik muhojirlar Shvetsiya parlamenti oldida Qur’onni yoqdi (video)

Stokgolmda Minttorget maydonidagi Shvetsiya parlamenti binosi oldida yana bir Qur’onni yoqish aksiyasi o‘tkazildi, deb xabar bermoqda The Local. Ikki erkak — Iroq fuqarolari Salvan Momika va Salvan Najem avval kitobni tepkilab, so‘ng sahifalariga o‘t qo‘ygan. Shundan keyin ular Qur’onning yana bir nusxasini yirtib, axlat qutisiga tashlagan.

Stokgolm politsiyasi matbuot kotibi Mats Erikssonning AFP’ga aytishicha, tadbir “jamoat tartibiga putur yetkazmagan holda o‘tkazilgan”.

Shvetsiyada muqaddas kitoblarni tahqirlashga qarshi hech qanday qonun yo‘q. Politsiya, agar ular katta tartibsizliklarga olib kelmasligiga ishonsa, bunday namoyishlar uchun ruxsat berishi mumkin.

28-iyun kuni Salvan Momika xuddi shunday aksiyani Stokgolmda shahar politsiyasi ruxsati bilan Medboryarplatsen maydonida amalga oshirgandi. Stokgolm sobori masjidi yaqinida bo‘lib o‘tgan aksiyani 200 dan ortiq odam, jumladan, OAV vakillari ham tomosha qilgan. Mitingdan bir kun o‘tib, Bag‘doddagi Shvetsiya elchixonasi oldida yuzdan ortiq iroqlik namoyishchilar to‘plangan, bir guruh iroqliklar norozilik sifatida Shvetsiya elchisi Jessika Svardstryomni haydab yuborishni talab qilgan.

Salvan Momika va Salvan Najem 20-iyul kuni ham Stokgolmdagi Iroq elchixonasi oldida Qur’onni oyoqosti qilgandi.