Turkmanistonning O‘zbekistondagi yangi elchisi tayinlandi
Shadurdi Meredov Turkmanistonning O‘zbekistondagi favqulodda va muxtor elchisi etib tayinlandi. Bu haqda “Turkmenportal” xabar berdi.
Tayinlovga qadar Shadurdi Meredov Turkmanistonning Qirg‘izistondagi elchisi lavozimida faoliyat yuritgan.
Iyul o‘rtalarida Turkmanistonning O‘zbekistondagi elchisi Yazguli Mammedov boshqa ishga o‘tgani munosabati bilan lavozimidan bo‘shatilgan edi. Yazguli Mammedov 2018-yil iyul oyida O‘zbekistondagi elchi etib tayinlangan edi. Bungacha u Turkmanistonning Malayziya, Bruney-Dorussalom davlati, Indoneziya va Tailanddagi elchisi lavozimlarida ishlagan. Yazguli Mammedov 2012—2018-yillarda Turkmanistonning Toshkentdagi diplomatik vakolatxonasini boshqargan Shiri Shiriyev o‘rnini egallagan.
Bundan oldin Buyuk Britaniyaning O‘zbekistondagi yangi elchisi etib Timoti Smart tayinlangani, O‘zbekiston tashqi ishlar vaziri Baxtiyor Saidov yangi tayinlangan Malayziya elchisi Ilxam Tua bin Illiasdan ishonch yorliqlarining nusxalarini qabul qilib olgani to‘g‘risida xabar berilgandi.
