Qarshida ko‘cha chiroqlarini o‘rnatish bahonasida 1,3 mlrd so‘m talon-toroj qilindi
Qashqadaryo viloyati Qarshi shahrida kredit mablag‘larini o‘zlashtirgan MCHJ rahbari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Qarshi shahar bo‘limi tomonidan tergovga qadar tekshiruv o‘tkazilgan. Tekshiruv davomida “M.S.” va “A.H.” MCHJ taʼsischisi J.T. shahar Obodonlashtirish boshqarmasi masʼul shaxslari bilan o‘zaro til biriktirib, Nasaf ko‘chasida ko‘cha chiroqlarni o‘rnatishda rasmiy hujjatlarga bajarilmagan ishlarni qo‘shib yozish orqali 1,3 milliard so‘mni o‘zlashtirish yo‘li bilan talon-toroj qilgani aniqlangan. Shuningdek, u 1,8 milliard so‘m soliqlarni to‘lashdan bo‘yin tovlagan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 209-moddasi (mansab soxtakorligi) va 184-moddasi (soliqlar yoki yig‘imlarni to‘lashdan bo‘yin tovlash) bilan jinoyat ishi qo‘zg‘atilib, tergov harakatlari o‘tkazilmoqda.
Kredit mablag‘larining o‘zlashtirilishi
Fevral oxirlarida Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. May oyida esa Surxondaryo va Farg‘onada oilaviy korxonalar rahbarlari 1,2 milliard so‘mdan ortiq imtiyozli kreditlarni talon-toroj qilgani to‘g‘risida xabar berilgan edi. Shuningdek, Qoraqalpog‘istonda davlat dasturi doirasida ajratilgan kredit mablag‘lari talon-toroj qilingani ma’lum bo‘lgandi.
