Polsha Mudofaa vazirligi Belarusga qarshi qurol ishlatishga tayyorligini ma’lum qildi
Polsha Qurolli kuchlari Bosh qo‘mondonligining birinchi o‘rinbosari Marek Sokolovskiy Belarus bilan chegaraga joylashtirilgan polshalik vertolyot uchuvchilari zarurat tug‘ilsa, qurol ishlatishdan tap tortmasliklarini aytdi.
“Vertolyotlar qurollangan va jangga tayyor. Bizda to‘liq vakolatga ega juda tajribali uchuvchilar bor, ular Afg‘oniston va Iroqda men bilan birga havo-desant qurollari va raketalarni amalda qo‘llagan uchuvchilar. Agar biror voqea yuz bersa, ular qurol ishlatishdan tortinmaydilar”, — dedi Sokolovskiy brifingda.
Qo‘mondon o‘rinbosarining ta’kidlashicha, chegara hududlariga quruqlikdagi kuchlarning birinchi aviatsiya brigadasi va Polsha Qurolli kuchlarining 25-havo kavalereyasi brigadasi vertolyotlari joylashtirilgan. Ular zudlik bilan javob qaytarish rejimida bo‘lib, ikkita pozitsiyada turadi, dedi u.
1-avgust kuni Polsha Mudofaa vazirligi Belovetsa viloyatida past balandlikda ikki Belarus vertolyoti mamlakat havo hududini buzganini ma’lum qildi. Polsha tahlilchilarining fikriga ko‘ra, bu Mi-24 va Mi-8 edi.
Bunga javoban Belarus Mudofaa vazirligi bunday bayonot bilan Polsha chegara yaqinida qo‘shinlar to‘planishini oqlashga urinayotganini ma’lum qildi.
Bugun, 3-avgust kuni Polsha hukumatining sobiq rahbari Vlodzimej Tsimoshevich RMF FM radiosiga bergan intervyusida o‘sha ikki vertolyot Belarus prezidentining qo‘riqlash xizmatiga tegishli ekanligini aytdi. Minsk bu ma’lumotlarni rad qildi.
