Niger isyonchilari ag‘darilgan prezidentni o‘ldirish bilan AQSHga tahdid qildi
Nigerda hokimiyatni egallagan isyonchilar AQSH davlat kotibi o‘rinbosari Viktoriya Nulandga agar boshqa davlatlar vaziyatga harbiy yo‘l bilan aralashsa, ag‘darilgan prezident Muhammad Bazumni o‘ldirishini aytdi. Bu haqda Associated Press xabar berdi.
Isyonchilar amerikalik diplomatning shu hafta Nigerga tashrifi chog‘ida unga tegishli ogohlantirishni yetkazdi. AQSH rasmiysi bu ma’lumotni tasdiqladi.
26-iyul kuni hokimiyatdan ag‘darilgan Bazum o‘z uyida garovga olingan. Isyonchilarning murojaati Afrika davlatlari Nigerga 25 ming nafar harbiy yubormoqchiligi va Fransiya harbiylari Bazumga qarshi bo‘lgan milliy gvardiyaga “hujum qilgani” fonida yangradi.
Nigeriya 25 ming nafar harbiy kontingentning yarmini berishga tayyor, qolganini Kot-d’Ivuar, Senegal va Benin beradi. Nigeriya harbiylari bu kuchlarga boshchilik qiladi.
G‘arbiy Afrika davlatlarining iqtisodiy hamjamiyati (ECOWAS) konfliktni kuch ishlatish bilan hal qilish ssenariysini ekstremal variant sifatida ko‘rmoqda.
Nigerda harbiy to‘ntarish
Nigerda 26-iyul kuni harbiy to‘ntarish sodir bo‘ldi. Prezident gvardiyasi davlat rahbari Muhammad Bazumni hokimiyatdan chetlatdi. Ikki kundan so‘ng prezident gvardiyasi boshlig‘i general Abdurahmon Tchiani o‘zini yangi davlat rahbari deb e’lon qildi.
ECOWAS mamlakatlari Nigerga harbiylarni kiritishga tayyorligini e’lon qildi. Bunga javoban davlat to‘ntarishlari natijasida hokimiyatga kelgan harbiylar tomonidan boshqariladigan Mali va Burkina-Faso “Niger ishlariga har qanday harbiy aralashuv ularga qarshi urush eʼlon qilish bilan barobar bo‘lishini” bildirdi
