O‘zbekistonda mavsumiy agronomlar hududlarga biriktirilib, oylik ish haqi bilan ta’minlanadi
Prezident 11-avgust kuni Buxoroda o‘tkazilgan videoselektor yig‘ilishida dala chetlaridan samarali foydalanish muhimligini ko‘rsatib o‘tdi.
Qayd etilishicha, 2023-yildan boshlab 70 mingdan ziyod fermerlarning 60 ming gektar bo‘sh dala chetlarida uzum, qovoq, qovun, tarvuz va sabzavot ekib, qo‘shimcha 220 ming tonna mahsulot yetishtirish, 600 ming bosh parranda va 300 ming dona asalari oilasini boqish bo‘yicha katta dastur qabul qilingan. Lekin ayrim viloyat, tuman hokimlari bunga e’tiborsiz qaramoqda.
Jumladan, sabzavot, poliz va boshqa ekinlar Navoiyda faqat 31 foiz, Farg‘onada 34 foiz, Toshkent viloyatida 70 foiz maydonlarga ekilgan, xolos. Qoraqalpog‘istonda 16 ming gektar dala chetlari mavjud bo‘lsada, 5 ming gektar bilan cheklangan, Namanganda 17 ming gektar o‘rniga 3,5 ming, Qashqadaryoda 26 ming gektar o‘rniga 12 ming, Buxoroda 22,5 ming gektar o‘rniga atigi 5,5 ming gektar dala chetlari o‘zlashtirilgan.
Shu munosabat bilan qishloq xo‘jaligi kompleksi rahbarlari viloyat va tuman hokimlari bilan birga bo‘sh dala chetlaridan samarali foydalanish bo‘yicha mas’uliyatini kuchaytirishi shartligi ko‘rsatib o‘tildi.
Shu sababli Qishloq xo‘jaligi vazirligiga quyidagi vazifalar topshirildi:
- har bir hududga mos urug‘ va ko‘chat navlarini tanlab, fermerlarga yetkazish tizimini yaratish;
- dehqonlarni dala chetlaridan samarali foydalanish, mineral o‘g‘it va kimyoviy preparatlarni ishlatish ko‘nikmalariga o‘qitish;
- har bir tumanga 4 nafargacha, jami 672 nafar mavsumiy agronomlarni biriktirib, oylik ish haqi bilan ta’minlash.
