Shavkat Mirziyoyev qator hududlarda elektr energiyasini tejash rejasi bajarilmaganini tanqid qildi

Shavkat Mirziyoyev 11-avgust kuni Buxoroda o‘tkazilgan videoselektor yig‘ilishida qator hududlarda elektr energiyasini tejash rejasi bajarilmaganini tanqid qildi.

Energiya ta’minotidagi defitsitni to‘liq qoplash maqsadida aprel oyida har bir tuman va shaharda o‘rganishlar o‘tkazilgani, shu asosda 4,5 milliard metr³ gaz va 7,5 milliard kilovatt soat elektrni iqtisod qilish bo‘yicha tumanbay dasturlar qabul qilingani qayd etildi.

Biroq yig‘ilishda ta’kidlanganidek, ko‘p hudud va tarmoqlarda hali aytarli natija bo‘lgani yo‘q, rahbarlari esa “so‘rov bo‘lmayapti” deb, bu vazifalarni o‘z holiga tashlab qo‘ygan.

Xususan, Toshkent viloyati rejaga nisbatan 40 million metr³, Toshkent shahri 19 million, Samarqand 13 million, Xorazm 3,5 million metr³ gazni ko‘p iste’mol qilgan. Elektr bo‘yicha Andijon, Buxoro, Jizzax, Namangan, Samarqand, Sirdaryo, Toshkent viloyati, Farg‘ona va Toshkent shahrining birorta tumani tejash rejasini bajarmagan.

Energetika kompleksi rahbarlari bu ishlarni pastda tizimli tashkil qila olmayotgani ko‘rsatib o‘tildi.

Shuningdek, jahonda energiya resurslarini tejash masalasining dolzarbligi tobora ortib borayotgani sabab O‘zbekistonda “yashil energetika”ni rivojlantirish va iqtisodiyotga energiya tejamkor texnologiyalarni keng joriy qilish bo‘yicha katta marralar olingani ham aytib o‘tildi.