Entoni Joshua Robert Heleniusni chuqur nokautga uchratdi 

Super og‘ir vazn toifasida sobiq jahon chempioni Entoni Joshua 12-avgust kuni Londonda Robert Heleniusga qarshi jang qildi.

Londonning O2 arenasi mezbonlik qilgan oqshomda Joshua Heleniusni 7-raundda muddatidan avval mag‘lubiyatga uchratdi. 

Eslatib o‘tamiz, Robert Helenius ushbu turnirda doping-testdan muvaffaqiyatli o‘ta olmagan Dillian Uaytning o‘rnini egallagandi.

Turnirning asosiy janglari natijalari: 

• Entoni Joshua (26-3) Robert Heleniusni (32-5) yettinchi raundda nokautga uchratdi;
• Derek Chisora (34-13) hakamlar qaroriga ko‘ra Jerald Vashington (20-6-1) ustidan g‘alaba qozondi;
• Filip Hrgovich (16-0) o‘n ikkinchi raundda Demsi Makkinni (22-1) texnik nokautga uchratdi;
• Jonni Fisher (10-0) Garri Armstrongni (5-2-1) yettinchi raundda texnik nokautga uchratdi;
• Kempbel Hatton (13-0) Tom Ansellni (10-5) mag‘lub etdi.