Video: Toshkentda yo‘l o‘tkazgich beshta to‘sini bir vaqtning o‘zida qulab tushishi
Islom Karimov nomidagi Toshkent xalqaro aeroporti yaqinida yo‘l o‘tkazgichning beshta to‘sini qulab tushgandi. Ijtimoiy tarmoqlarda holat aks etgan video tarqaldi.
Holat 12-avgust kuni poytaxtning Yakkasaroy tumani Bobur ko‘chasidan Islom Karimov nomidagi Toshkent xalqaro aeroportiga olib boruvchi va Sodiq Tolipov ko‘chasiga chiqish va tushishga imkon beruvchi yo‘l o‘tkazgichni zamonaviy qurilish standartlari asosida qayta qurish vaqtida sodir bo‘lgandi.
Holat aks etgan videoda to‘sinlarning bir qismi yuk mashinasini bosib qolganini ko‘rish mumkin.
“O‘zbekiston temir yo‘llari” bergan ma’lumotga ko‘ra, temir-beton oraliq qurilmalarini (balka) kran yordamida montaj qilish jarayonida ehtiyotsizlik oqibatida bir-biriga urilib, 5 dona balka montaj joyidan tushib ketgan. Voqea natijasida hech kim jabrlanmagan
Transport prokuraturasi hodisa oqibatda 2 milliard 760 million so‘mlik zarar yetkazilganini ma’lum qildi. Jinoiy ish ochilib, uch nafar mansabdor gumonlanuvchi sifatida ushlangan.
