“Dok-1 Maks” ishidagi sudda advokatlar “Qalampir.uz” va “Kun.uz” saytini aybsizlik prezumpsiyasiga amal qilmaslikda aybladi
O‘zbekistonda 65 nafar bola o‘limiga sabab bo‘lgan “Dok-1 Maks” dori vositasi bo‘yicha sud ishi boshlangani, mazkur jinoyat ishida 21 nafar kishiga nisbatan ayblov eʼlon qilingani xabar berilgandi. Jinoyat ishlari bo‘yicha Toshkent shahar sudi qisqa tanaffusdan so‘ng sud majlisini davom ettirmoqda. Bu haqda sud majlisida ishtirok etgan “Daryo” muxbiri xabar berdi.
Sud avvalida sudlanuvchi A.A.ning advokatlari — M.Madaminov hamda A.Husanovlar “Qalampir.uz” sayti jurnalisti Hulkar Murtozoyevani sud jarayonini yoritishda aybsizlik prezumpsiyasiga amal qilmaganlikda ayblab, suddan chetlatish bo‘yicha iltimosnoma kiritdi.
Shuningdek, yana bir advokat Ilhom Rahmatov “Kun.uz” nashrini ham aybsizlik prezumpsiyasiga amal qilmaganlikda aybladi. Ammo nashr jurnalistlarini suddan chetlatishni so‘ramadi.
Sud mazkur iltimosnomani rad etdi. Ammo OAV vakillariga jarayonni yoritishda aybsizlik prezumpsiyasiga amal qilishni so‘radi.
Sudda, shuningdek, ayblanuvchi A.A.ning advokati sudlanuvchiga nisbatan qo‘llanilgan qamoq ehtiyot chorasini bekor qilib, unga qamoqqa olish bilan bog‘liq bo‘lmagan ehtiyot chorasi qo‘llanilishini so‘radi. Sud hayʼati mazkur iltimosnomani ham rad etdi.
