Panamada yo‘lovchi samolyot uchuvchisi parvoz paytida vafot etdi
AQSHdan Chiliga uchayotgan yo‘lovchi samolyoti Panamaga shoshilinch qo‘ndi. Bunga parvoz vaqtida uchuvchilardan birining sog‘lig‘i yomonlashgani sabab bo‘ldi.
Latam aviakompaniyasiga qarashli samolyot Mayamidan Santyagoga uchayotgan bo‘lgan. Sog‘lig‘i yomonlashgan uchuvchining o‘rnini boshqa ekipaj a’zosi egallab, shoshilinch tibbiy yordam ko‘rsatish uchun samolyotni Tocumen xalqaro aeroportiga (Panama) qo‘ndirishga muvaffaq bo‘ldi.
Aviakompaniya vakillarining so‘zlariga ko‘ra, uchuvchining hayotini saqlab qolish uchun xavfsizlik protokoli bo‘yicha barcha zarur choralar ko‘rilgan. Shunga qaramay, uchuvchi vafot etdi. O‘lim sababi hozircha aniqlanmagan.
Ma’lumotlarga ko‘ra, uchuvchi aviakompaniyada 25 yildan beri ishlab kelayotgan bo‘lgan.
Iyun oyida Moskvadan Namanganga uchayotgan samolyot zudlik bilan Toshkentga qo‘ngandi. Bunga homilador yo‘lovchi ayolda tug‘uruq jarayoni boshlangani sabab bo‘lgan. Samolyot Toshkent xalqaro aeroportiga qo‘nganidan so‘ng ayol tibbiy muassasaga olib ketilgan.
