Surxondaryoda Janubiy Koreyaga ishga yuborishini aytib firibgarlik qilgan erkak ushlandi
Surxondaryoning Denov tumanida Janubiy Koreyaga ishga yuborishini aytib firibgarlik qilgan erkak ushlandi. Bu haqda Bosh prokuratura huzuridagi departament xabar berdi.
Departamentning Denov tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda fuqaro O.Yu. fuqaro Q.I.ni 12 000 dollar evaziga Janubiy Koreyaga ishlash uchun yuborishni va’da qilib, oldindan 48 million so‘m va 2 000 AQSH dollarini olgan vaqtida ashyoviy dalillar bilan ushlangan.
Shuningdek, O.Yu. muqaddam ikki nafar fuqaroni ushbu davlatga ishga yuborish evaziga 4 800 dollar va 88 million so‘mni firibgarlik yo‘li bilan qo‘lga kiritgani aniqlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
