Ukrainadagi maktabga dron hujumi tufayli ikki o‘qituvchi halok bo‘ldi (foto)

Rossiya qo‘shinlari Ukrainaning Sumi viloyati Romni shahridagi maktabga hujum qildi. Bu haqda Ukraina Ichki ishlar vazirligi rahbari Igor Klimenko Telegram sahifasida xabar berdi.

Hujum oqibatida kamida ikki o‘qituvchi halok bo‘ldi, deydi u. Qutqaruvchilar ularning jasadini topgan. Shuningdek, hujumda uch kishi jarohatlangan. Klimenkoning qo‘shimcha qilishicha, yana ikki maktab xodimi vayronalar ostida qolayotgan bo‘lishi mumkin.

Ukraina Bosh prokuraturasi maktab binosiga dron hujumi 23-avgust kuni soat 10:00 atrofida sodir bo‘lganini xabar qildi. Uch yarador ham ushbu ta’lim muassasasi xodimi ekani aytildi.

 Prokuratura xabarida aytilishicha, hujum sabab maktab binosi vayron bo‘lgan. Qutqaruvchilar vayronalar ostida qolgan odamlarni qidirishda davom etmoqda.

Shuningdek, 23-avgustga o‘tar kechasi Rossiya qo‘shinlari Odessa viloyatiga uchuvchisiz uchoqlar bilan hujum qilgan. Odessa viloyati harbiy ma’muriyati rahbari Oleg Kiperning so‘zlariga ko‘ra, hujum uch soat davom etgan, dronlar fuqarolik infratuzilmasi obyektlarini nishonga olgan.