O‘zbekistonda ko‘p kvartirali uylardagi ko‘chmas mulk bo‘yicha bitimlar mulkdorning qarzdorligi yo‘qligi tekshirilgandan keyin tasdiqlanadi
“Ko‘p kvartirali uylarni boshqarishni yanada samarali tashkil qilish chora-tadbirlari to‘g‘risida”gi prezident qarori qabul qilindi.
Qarorga ko‘ra, respublikadagi chegaralari belgilanmagan ko‘p kvartirali uylarning tutash yer uchastkalari chegaralari belgilanib, “Yerelektron” axborot tizimiga kiritiladi.
2024-yil 1-yanvardan:
- ko‘p kvartirali uylardagi ko‘chmas mulk bilan bog‘liq bitimlar notariuslar tomonidan mulkdorning majburiy badallar yoki to‘lovlar bo‘yicha qarzdorligi mavjud emasligi tekshirilgandan keyin tasdiqlanadi;
- majburiy badallarning yoki to‘lovlarning eng kam miqdori Qurilish va uy-joy kommunal xo‘jaligi vazirligi tomonidan belgilanadi;
- agrotexnik ishlov berishdan hosil bo‘ladigan (daraxt va buta shox-shabbalari, barglari) va ko‘p kvartirali uylarga tutash hududlarni tozalashdan hosil bo‘lgan chiqindilarni maishiy chiqindilarni to‘plash punktlarida yoki chiqindilarni olib chiqib ketish operatorlari bilan kelishilgan maxsus joylarda yig‘ishga ruxsat etiladi.
Hisob palatasi bosh prokuratura hamda Qurilish va uy-joy kommunal xo‘jaligi vazirligi bilan birgalikda bir oy muddatda ko‘p kvartirali uy-joylar mulkdorlari shirkatlari va boshqaruvchi tashkilotlarning hududiy elekr tarmoqlari korxonalari oldidagi 80,5 milliard so‘m qarzdorlik va ular uchun hisoblangan jarimalar yuzasidan o‘rganish o‘tkazib, bu qarzdorlikni undirish bo‘yicha takliflar kiritadi.
Bunda qarzdorlikning to‘lov muddati 2024-yil 1-oktabrgacha kechiktiriladi.
