Toshkentda metro poyezdlari oraliq vaqti qisqartirilib, avtobuslar soni oshiriladi

Yangi o‘quv yili boshlanishi bilan Toshkent metrosida poyezdlar oraliq vaqti qisqartiriladi. Bu haqda metropoliten ma’muriyati O‘zAga ma’lum qilgan.

4-sentabrdan o‘quv mashg‘ulotlari boshlanishi sabab shahar jamoat transportiga bo‘lgan talab oshadi. Mazkur talabni qondirish va metrodan foydalanishda yo‘lovchilarga yanada qulaylik yaratish maqsadida poyezdlar vaqt oraliqlari qisqartirilishi rejalashtirilgan.

Xususan, tig‘iz vaqtlarda Chilonzor yo‘nalishida 1,5 daqiqalik, O‘zbekiston yo‘nalishida esa 3-3,5 daqiqalik hamda Yunusobod yo‘nalishida esa, 5 daqiqalik intervalda poyezdlar harakati yo‘lga qo‘yiladi.

Shuningdek, Toshkent shahridagi yo‘lovchilar tashish uzluksizligini ta’minlash va ko‘rsatilayotgan xizmatlar sifatini yanada oshirish maqsadida, bugungi kunda ishga chiqarilayotgan 1464 ta avtobuslar sonini 1550 tagacha va bajariladigan qatnovlar sonini 21,7 mingtadan 22,8 mingtaga oshirish rejalashtirilgan.

Bundan tashqari, sentabr oyi davomida qo‘shimcha yana 9 ta yangi avtobus yo‘nalishlarini tashkil qilish rejalashtirilgan.