Ukraina qo‘shinlari Belgorodga kassetali o‘q-dorilar bilan hujum qilgani aytildi (foto)

Rossiyaning Belgorod viloyati gubernatori Vyacheslav Gladkovning aytishicha, Ukraina qo‘shinlari Valuyskiy shahar okrugidagi Urazovo posyolkasiga “Grad” yoppasiga o‘t ochuvchi reaktiv tizimlardan kassetali o‘qlar otgan. Ukrainaliklar posyolkka kassetali o‘q bilan zarba bergani bo‘yicha mustaqil dalil yo‘q.

Rasmiylarning dastlabki ma’lumotlariga ko‘ra, to‘rt kishi jarohatlangan: uch erkak va bir ayol, ular predmetlar parchalari bilan jarohatlanib, kasalxonaga yotqizilgan.

Viloyat rahbarining so‘zlariga ko‘ra, zarba xususiy uylar va qishloq xo‘jaligi do‘koniga teggan. Bir necha uy va mashinaga zarar yetgan. Gladkov vayron bo‘lgan turar joy binolari, shuningdek, yonilg‘i quyish shoxobchasi yonidagi oynasi singan mashina tasvirlarini ko‘rsatdi. Kadrlardan birida kichik yong‘in belgilari ko‘rinadi.

Belgorod viloyati va boshqa chegaradosh hududlar Rossiyaning Ukrainaga keng ko‘lamli bosqinidan so‘ng muntazam ravishda o‘qqa tutilmoqda. Ukrainaning qarshi hujumi boshlanishidan oldin Belgorod viloyati chegara hududlarini o‘qqa tutish sezilarli darajada oshdi. Ukraina tomonida jang qilayotgan Rossiya ko‘ngillilar korpusi va Rossiya ozodlik legioni bo‘linmalari Belgorod viloyatida bir necha bor reydlar uyushtirdi va chegaradagi aholi punktlari ustidan vaqtincha nazorat o‘rnatdi.