“Tolibon” ayollarga Afg‘onistondagi milliy parkka borishni taqiqladi
“Tolibon” hukumati hijob o‘rash qoidalariga rioya qilmagani uchun Bomiyon viloyatidagi Bandi Amir milliy bog‘iga ayollarning kirishini taqiqladi. Bu haqda ezgulikni targ‘ib qilish va illatlarning oldini olish vaziri Muhammad Xolid Hanafiyga tayanib, ToloNews xabar berdi.
“Rafiqalarimiz va opa-singillarimiz toki biz ular uchun tartib-qoidalarni belgilamagunimizcha Bandi Amirga tashrif buyura olmaydi. Xavfsizlik kuchlari, oqsoqollar va politsiya o‘rinbosari chora ko‘rishlari kerak. Turizm hayotiy zarurat emas”, — dedi vazir.
Muhammad Hanafiy o‘z bo‘limi milliy parkka tashrif buyuruvchilar uchun qanday “qoidalar” o‘rnatishini tushuntirmagan. Bomiyon viloyatidagi din arboblari parkka kelgan ayollarni hijob qoidalariga rioya qilmaslikda ayblamoqda. Ularga ko‘ra, islomiy kiyinish qoidalarini buzuvchilar boshqa viloyatlardan yoki xorijdan kelmoqda.
Bandi Amir Afg‘onistondagi birinchi milliy park bo‘lib, u 2009-yilda oltita firuza ko‘l tabiiy majmuasi atrofida paydo bo‘lgan. Fuqarolar urushi boshlanishidan oldin bu joy g‘arblik sayyohlar orasida mashhur bo‘lgan.
Afg‘onistonda ayollarga nisbatan joriy qilingan taqiqlar
- Afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish taqiqlangan.
