Ukraina armiyasi Rabotinoni to‘liq ozod qildi. U hozir qanday ko‘rinishda? (foto)

Ukraina mudofaa kuchlari Zaporojye viloyatidagi Rabotino qishlog‘ini to‘liq ozod qildi. Bu haqda mudofaa vaziri o‘rinbosari Anna Malyarga tayanib, “Ukrainskaya pravda” xabar berdi.

“Janubda hujumni davom ettirmoqdamiz. Bu bizning asosiy hujum yo‘nalishimiz hisoblanadi. Dushman Zaporojye va Xerson viloyatlarida mudofaa holatida. Rabotino ozod qilindi va bizning qo‘shinlarimiz Rabotinodan janubi-sharqga va Malaya Tokmachka janubiga qarab harakatlanmoqda”, — dedi mudofaa vaziri o‘rinbosari.

Malyarning aniqlik kiritishicha, gap Novodanilovka va Novoprokopovka, shuningdek, Malaya Tokmachka va Ocheretovaty yo‘nalishlari haqida ketmoqda.

“Bu bizning kuchlarimiz dushmanning shiddatli qarshiligiga qaramay, hozir oldinga siljiyotgan yo‘nalishdir”, — dedi u.

Shuningdek, Malyar Ukraina qo‘shinlari o‘tgan hafta Baxmut yo‘nalishida 1 kvadrat kilometrni ozod qilganini qo‘shimcha qildi.

“Baxmutning janubiy qanotida biz oldinga boryapmiz va o‘tgan hafta u yerda yana bir kvadrat kilometr ozod qilindi va allaqachon umumiy ozod qilingan hudud 44 kvadrat kilometrni tashkil etadi”, — dedi Ukraina Mudofaa vazirligi rasmiysi.