O‘zbekiston Afg‘onistonga har yili o‘rtacha 1 mln dollarlik protein va vitamin komplekslari yetkazib beradigan bo‘ldi

O‘zbekiston Afg‘onistonga protein va vitamin komplekslari yetkazib berish bo‘yicha kelishuvga erishdi. Bu haqda Farmatsevtika tarmog‘ini rivojlantirish agentligi xabar berdi.

 

 

Ma’lum qilinishicha, ayni paytda O‘zbekiston vazirlik va idoralari mas’ullaridan iborat bir guruh vakillar Afg‘onistonda bo‘lib turibdi. Delegatsiya tarkibida Farmatsevtika tarmog‘ini rivojlantirish agentligi boshqarmasi boshlig‘i Sherzod Yakubov ham bo‘lib, farmatsevtika va sog‘liqni saqlash sohasida Afg‘oniston va O‘zbekiston o‘rtasidagi hamkorlik masalalarida muzokaralar olib bormoqda.

Xususan, Afg‘onistonning “Fyucher Vels Trayding” kompaniyasi direktori G.Fahim bilan O‘zbekistondagi ishlab chiqaruvchilar tomonidan yiliga o‘rtacha 1 million dollarlik protein va vitamin komplekslarini yetkazib berish bo‘yicha kelishuvlarga erishildi.

Shuningdek, Afg‘oniston Aholi salomatligi vazirligining farmatsevtika xizmatlari direktori Hamid Furmuli bilan mazkur mamlakatdagi “Ibn Sina” korxonasi negizida shartnoma tuzish masalalari muhokama qilindi.

 

 

Afg‘onistonda davlat tomonidan aholini farmatsevtika mahsulotlari bilan ta’minlash xususiy sektor tomonidan amalga oshiriladi. Stomatologiya xizmatlari ko‘rsatish bo‘yicha Kobul shahrida atigi bitta korxona faoliyat ko‘rsatib kelayotgan bo‘lib, uchrashuvlar davomida Afg‘oniston tibbiyot xodimlarini Health manager bo‘yicha malakasini oshirish, qisqa muddatli kurslarda o‘qitish masalalari kelishildi.

Mazkur holatlar e’tiborga olinib, O‘zbekistonda ishlab chiqarilgan dori mahsulotlarini ushbu mamlakat bozoriga yetkazish borasida Afg‘oniston “Oziq-ovqat va dori vositalari sifatini nazorat qilish” milliy uyushmasi raisi, doktor A.Umar bilan samarali muzokaralar olib borildi.

Xususan, davlat ro‘yxatidan o‘tkazishning o‘zaro soddalashtirilgan tizimini (25 kungacha) joriy qilish bo‘yicha kelishuv loyihasi ishlab chiqilmoqda.