Ginnesning rekordlar kitobiga kiritilgan Bollivud yulduzlari
Hind kinoijodkorlari orasida Ginnesning rekordlar kitobiga ismi kiritilganlari talaygina. Quyida ana shunday mashhurlar haqida so‘z yuritiladi.
Kapurlar oilasi
Kapurlar — Bollivuddagi eng ko‘p aktyorlardan iborat oila hisoblanadi va 1999-yil Ginnesning rekordlariga kiritilgan. Ushbu oiladan ilk bor Pritxviraj Kapur 1929-yilda aktyor sifatida o‘z faoliyatini boshlagan, keyinchalik o‘g‘illari Raj, Shammi, Shashilar ota kasbni davom ettirgan. Kapurlarning taniqli qarindoshlari orasida Amitabx Bachchan, rejissorlar Ramesh Sippi va Manmoxan Desai ham bor. Ranbir Kapur va Karina Kapur bo‘lsa, Pritxviraj Kapurning nevaralari hisoblanadi.
Shohrux Xon
Bollivud qiroli Shohrux Xon eng badavlat hind aktyori hisoblanadi. U 2013-yilda 220,5 kror daromad bilan Ginnes rekordlaridan o‘rin olgan.
Katrina Kaif
Yosh bo‘lishiga qaramay Katrina Kaif Shohrux Xon bilan bir yilda Ginnes rekordlariga eng badavlat aktrisa sifatida kiritilgan. Ma’lumotlarga qaraganda, u bir yilda 63,75 kror daromad topishga muvaffaq bo‘lgan.
Ashok Kumar
Ashok Bollivud tarixida eng uzoq karyera qilgan aktyor sifatida rekord o‘rnatgan. Ta’kidlanishicha, u 1936-yilda “Jeevan Naiya” filmidagi debyutidan keyin 63 yil davomida tinimsiz suratga tushgan.
Abxishek Bachchan
Amitabx Bachchanning o‘g‘li Abxishek Ginnesning rekordlar kitobiga 2009-yilda kiritilgan. Uning rekord qo‘yishiga “Deli-6” filmi targ‘iboti uchun 12 soat ichida 7 ta shaharga borib, chiqish qilgani sabab bo‘lgan.
