Rossiyada otboqar o‘zbek yigit 16 yoshli chavandoz qizni o‘g‘irlab, O‘zbekistonga olib ketmoqchi bo‘ldi

Kaliningradda O‘zbekiston fuqarosi 16 yoshli qizni o‘g‘irlab ketdi. “Baza” nashri xabariga ko‘ra, u qizni uyiga olib ketib, uylanmoqchi bo‘lgan.

 

 

 

 

Qayd etilishicha, 22 yoshli o‘zbekistonlik shahardagi “Imperial park” ot sporti klubida otboqar bo‘lib ishlagan.

“U oila qurish vaqti keldi, deb o‘ylagan. Bundan tashqari, yigit uzoq vaqtdan beri klubdagi 16 yoshli chavandoz qizni yaxshi ko‘rardi. Keyin uni O‘zbekistondagi uyiga olib ketish fikri tug‘ilgan”, — deb ta’kidlaydi nashr.

29-avgust kuni kechqurun yigit voyaga yetmagan qizni ot sporti to‘garagidan chiqish joyida tutib olib, unga pichoq o‘qtalgan va o‘zi bilan birga aeroportga borishga majburlagan.

Qiz aeroport xodimlariga ogohlantiruvchi signal bergan, natijada migratsiya xizmati xodimlari O‘zbekiston fuqarosini qo‘lga olishga muvaffaq bo‘lgan.