Namangan xalqaro aeroportining yangilangan terminali foydalanishga topshirildi (video)

Namangan xalqaro aeroportining yangilangan uchib kelish terminali foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.

Terminalning yo‘lovchilarga xizmat ko‘rsatadigan umumiy maydoni rekonstruksiyadan keyin 2,5 baravarga ko‘paydi. Avval bu yerda soatiga 100 kishiga xizmat ko‘rsatilgan bo‘lsa, ushbu ko‘rsatkich uch baravarga oshib, soatiga 300 nafar yo‘lovchiga yetdi.

Shuningdek, terminalda elektr energiyasiga bo‘lgan ehtiyojning muayyan qismini qoplovchi quyosh panellari o‘rnatildi.

Kutib oluvchilarning mashinalari va yo‘nalishli transport uchun 100 o‘rinli avtoturargoh tashkil etildi.

Mazkur maqsadlar uchun 17 milliard so‘mdan ortiq mablag‘ sarflandi. Kelgusida aeroportning uchib ketish terminalini ham rekonstruksiya qilish rejalashtirilmoqda.

“Yonimizdagi O‘sh aeroportini tahlil qiladigan bo‘lsak, o‘zi kichkina bo‘lsa ham, yo‘lovchilarni qabul qilib olish va kuzatish borasida katta imkoniyatlarga ega. Buni Namangan misolida ham qo‘llashimiz zarur, chunki viloyat vodiyning havo darvozasi hisoblanadi”, — dedi ochilish marosimida ishtirok etgan viloyat hokimi Shavkat Abdurazzoqov.

Marosimdan so‘ng yangilangan terminalda Yekateringburgdan parvoz qilgan xalqaro va Toshkentdan uchib kelgan mahalliy reys yo‘lovchilari tantanali kutib olindi.