Isroilda eritreyalik muhojirlar politsiya bilan to‘qnashdi, 100 dan ortiq odam jarohatlandi (video)
Isroilning Tel-Aviv shahri janubiy tumanlarida Eritreyadan kelgan qochqinlar ishtirokida tartibsizliklar yuz berdi, deb yozmoqda “TASS”.
Tartibsizliklar Isroilda Eritreya madaniyati festivali o‘tkazilishiga qarshi namoyishlar ortidan boshlangan. Eritreyaning amaldagi hukumati muxoliflari mamlakatning Isroildagi elchixonasi yonida diplomatik missiya tomonidan bayram tadbiri o‘tkazilishiga norozilik bildirib chiqqan — norozilik to‘qnashuvlarga aylanib ketgan.
Namoyishchilar tadbir joyga bostirib kirib, toshlar otgan. Politsiya shovqinli granatalar bilan javob qaytargan.
Isroil politsiyasi tartibni buzganlarga qarshi harakatni davom ettirmoqda. Ayni damda politsiya xodimlariga hujum qilgan va politsiyaga tosh otgan 10 nafar qoidabuzar qo‘lga olindi, deyiladi xabarda.
Kamida 114 kishi, jumladan, 27 nafar huquq-tartibot idorasi xodimi yaralangan. Ayrim hollarda politsiya olomonni tarqatish uchun xizmat qurolidan foydalanishga majbur bo‘lgan, 11 kishi o‘qdan jarohat olgan.
