Jizzaxda Zomin aeroporti foydalanishga topshirildi
Jizzax viloyatida Zomin aeroporti foydalanishga topshirildi, deb xabar beradi viloyat hokimligi matbuot xizmati.
Qayd etilishicha, aeroport 30 o‘ringa mo‘ljallangan yo‘lovchi terminaliga ega bo‘lib, qurish uchun 60 gektar yer maydoni ajratilgan. Obyektda jami 200 dan ziyod xodimlar va 110 ta texnikalar bilan ishlar olib borilmoqda.
Hozirda aeroport infratuzilmasi, muhandislik kommunikatsiyasi, uchish-qo‘nish, harakatlanish yo‘laklari va perronni loyihalash hamda qurilish, uchish va qo‘nishni ta’minlash bo‘yicha radio va aeronavigatsiya uskunalarini xarid qilish, o‘rnatish va ekspluatatsiya qilish ishlari belgilangan reja asosida olib borilmoqda.
Zominda qurilayotgan yangi aerodromga 24-iyul kuni Toshkentdan ilk samolyot parvozi amalga oshirilgandi. O‘shanda poytaxtdan Let L-410 rusumli samolyot Zomingacha 32 daqiqada yetib borgan, 19 o‘ringa mo‘ljallangan ushbu samolyot tantanali ravishda kutib olingandi.
Eslatib o‘tamiz, Qashqadaryo, Surxondaryo va Jizzax viloyatlarining turizm salohiyatini yanada oshirish maqsadida Shahrisabz va Sariosiyo aeroportlariga aviaqatnovlarni tiklash, shuningdek, Zomin aeroportiga aviaqatnovlar yo‘lga qo‘yilishi haqida xabar berilgan edi.
