“Ukrainada tinchlikka erishish istiqbollari yo‘q” — Erdo‘g‘on

Turkiya prezidenti Rajab Toyyib Erdo‘g‘on Sochidan qaytgach, Ukrainadagi vaziyatni tinch yo‘l bilan hal qilish istiqbollari yo‘qligini aytdi. Bu haqda Ankara Masasi xabar berdi.

Erdo‘g‘on konfliktning birinchi kunidanoq Turkiya “tinchlik, muloqot va diplomatiya” tarafdori bo‘lgani, “muammoni yanada kuchaytirmagani va olovga moy sepmaganini” taʼkidladi.

“Afsuski, 1,5 yildan beri davom etayotgan urush hali ham davom etmoqda. Ufqda tinchlikka erishish istiqboli ko‘rinmayapti”, — deydi u.

Qora dengiz tashabbusining aktivlashishi haqida gapirgan Erdo‘g‘on, Turkiyaning hissasi natijasida BMT tashabbusning jonlanishiga yo’l ochadigan yangi paket tayyorlaganini aytdi.

“Turkiya tashqi ishlar vaziri Moskvaga tashrifi chog‘ida rossiyalik hamkasbi Sergey Lavrov bilan ushbu tashabbusning texnik jihatini, yangi takliflar paketini gaplashdi. Putin bilan bu masalani muhokama qildim. Uni batafsil baholadim. Umid qilamanki, qisqa vaqt ichida umidlarni oqlaydigan yaxshi natijaga erishamiz”, — dedi u.

Bundan tashqari, Erdo‘g‘on mamlakat Ukrainadagi mojaroni hal qilish uchun vositachilik xizmatlarini o‘z zimmasiga olishga tayyorligini bildirdi.

“Agar tomonlar shunday istak bildirsa, biz o‘z hissamizni qo‘shishga tayyormiz. Shuningdek, mahbuslar almashinuvi va Zaporojye atom elektr stansiyasi kabi masalalarda vositachilik rolini o‘ynashda davom etamiz. Ikki qo‘shnimiz va mintaqamizga zarar keltiruvchi bu urush imkon qadar tezroq xalqaro huquq asosida adolatli va mustahkam tinchlik o‘rnatilishi bilan yakunlanishiga umid qilamiz”, — ta’kidladi u.

Erdo‘g‘onning aytishicha, Rossiya rahbarining don yo‘lagi kelishuvini yangilash bo‘yicha ikkita aniq iltimosi bor.

“Ulardan biri Rossiya qishloq xo’jalik bankining SWIFT tizimiga ulanishi, ikkinchisi esa don tashishda foydalaniladigan kemalarning sug’urtasi”, — dedi siyosatchi.

Turkiya prezidenti Putin 6 ta davlatga don jo‘natish masalasini ko‘rib chiqayotganini aytdi.