Olmaota viloyatida Nazarboyevning singlisi egalik qiladigan kollej davlatga qaytarildi — OAV
Qozog‘istonning Olmaota viloyatida “Ushqo‘ng‘ir suv xo‘jaligi kolleji” davlat mulkiga qaytarildi, deb xabar bermoqda “Beshinchi hudud” nashri. Kollejga mamlakat sobiq prezidenti Nursulton Nazarboyevning singlisi Anipa Nazarboyeva egalik qilardi.
Nashr maʼlumotlariga ko‘ra, 2022-yil sentabrda Olmaota viloyati moliya boshqarmasi Anipa Abishevna Nazarbayevaga qarashli “Anipa” yakka tadbirkorlik korxonasi ustidan sudga shikoyat qilgan.
Ma’lum bo‘lishicha, 2016-yilda kollej Olmaota viloyati moliya boshqarmasi tomonidan “Anipa” korxonasiga sotib olish huquqi bilan ishonchli boshqaruvga topshirilgan.
Sud da’vogarning shikoyatini qanoatlantirdi va 2016-yilgi shartnomani bekor qilishga qaror qildi.
Bundan tashqari, sud Anipa Nazarboyevadan 3 450 tenge (75 dollar) miqdorida davlat boji undirish haqida qaror chiqardi.
Avval Nazarboyevning sobiq kelini 7 yilga ozodlikdan mahrum qilingandi. U birdaniga bir nechta moddalar bo‘yicha aybdor deb topilgan.
- Eslatib o‘tamiz, avgust boshida The Times nashri Britaniyada Nazarboyevning qizi va kuyoviga tegishli 50 million dollarlik ko‘chmas mulklar haqida xabar berdi.
- Ofshor kompaniyalar orqali Qozog‘iston sobiq rahbarining oilasiga tegishli bo‘lgan Londondagi ko‘chmas mulk haqidagi ma’lumotlar Britaniya hukumati tomonidan yuritiladigan xorijiy kompaniyalarning benefitsiar egalari davlat reyestri tufayli ommaga oshkor bo‘ldi.
