“Strategik ahamiyatli”: Ukraina Qora dengizdagi neft platformalarini nazoratiga qaytardi (foto) 

Ukraina harbiy razvedkasi Qora dengizdagi Boyko vishkalari — gaz va neft platformalari ustidan nazoratni qaytarganini e’lon qildi. Bu haqda xabar berdi.

Razvedka ma’lumotiga ko‘ra, “Pyotr Godovanets” va “Ukraina” burg‘ilash platformalari, shuningdek, “Tavrida” va “Sivash” suzuvchi burg‘ilash qurilmalari nazorat ostiga qaytarilgan. 

Bundan tashqari, operatsiya davomida vertolyot o‘q-dorilari va Qora dengizdagi kemalar harakatini kuzata oladigan Neva radar tizimi qo‘lga kiritilgan. Katerlardagi Ukraina maxsus kuchlari va Rossiya aerokosmik kuchlarining Su-30 qiruvchisi o‘rtasidagi jangda rus samolyoti shikastlangani aytilmoqda.

“Ukraina razvedkasi platformalar ustidan nazoratni qayta tiklash bo‘yicha operatsiyani strategik ahamiyatga ega deb hisoblaydi —shu tariqa Rossiya Qora dengizni to‘liq nazorat qilish imkoniyatidan mahrum bo‘ladi. Bu Ukrainani Qrimni qaytarishga yaqinlashtiradi”, — deydi razvedka.

Rossiya Mudofaa vazirligi Qora dengizdagi mazkur vaziyatga izoh bermadi.

Boyko minoralari (“Vishki Boyko”) “Chernomorneftegaz” kompaniyasi tomonidan boshqarilgan. 2014-yilda Qrim anneksiya qilinganidan keyin “Chernomorneftegaz” Rossiya nazoratiga o‘tdi.

Britaniya razvedkasining ta’kidlashicha, Ukrainaga hujumdan beri Rossiya platformalardan vertolyotlar uchun maydonchalar va uzoq masofaga uchuvchi raketa tizimlarini joylashtirish uchun foydalangan. Bu ma’lumotga Ukraina razvedkasi ham qo‘shilgan.