“Rossiya yovuzlikka qarshi bu muqaddas urushda g‘alaba qozonadi” — Kim Chen In
Shimoliy Koreya yetakchisi Kim Chen In rossiyalik hamkasbi Vladimir Putin bilan uchrashuvda Rossiya “ushbu muqaddas urushda yovuzlik ustidan g‘alaba qozonishini” aytdi. Bu haqda Reuters xabar berdi.
“Rossiya armiyasi va xalqi gegemonlikka daʼvo qilayotgan va ekspansionistik illyuziyalarga ega bo‘lgan buyuk yovuzlikni jazolash uchun olib borilayotgan muqaddas kurashda, albatta, katta g‘alaba qozonadi”, — dedi Kim.
U Putinning salomatligi, “buyuk Rossiya g‘alabasi”, Koreya—Rossiya do‘stligi va yig‘ilganlarning salomatligi uchun qadah ko‘tarishdan oldin shunday nutq so‘zladi.
Rasmiy tushlik chog‘ida Putin “Rossiya va KXDR o‘rtasidagi do‘stlikni mustahkamlash, mamlakatlar xalqlarining farovonligi hamda o‘rtoq Kim salomatligi uchun” qadah ko‘tardi.
Kim Chen Inning Rossiyaga tashrifi
13-sentabr kuni Shimoliy Koreya yetakchisi Kim Chen In Putin bilan muzokaralar olib borish uchun Rossiyaga keldi. Kreml rahbari o‘z hamkasbini kosmodromga olib borib, unga raketalarni ko‘rsatdi.
Rossiya Shimoliy Koreyadan 122 va 152 millimetrli artilleriya snaryadlari, shuningdek, 122 millimetrli raketalarni olishga qiziqish bildirmoqda.
O‘z navbatida, Pxenyan snaryadlar uchun to‘lov evaziga Rossiyaning yadroviy suvosti kemalarini qurish texnologiyalari va sun’iy yo‘ldoshlarni uchirish uchun kosmik texnologiyalarni olishga umid qilmoqda.
