Turkmaniston Qatarni mahalliy energetika sohasiga sarmoya kiritishga chaqirdi
Turkmaniston qatarlik investorlarni Respublikadagi energetika, oziq-ovqat va to‘qimachilik sohalarini o‘rganishga chaqirdi. Bu haqda Qatar palatasi xabar berdi.
Turkmaniston Savdo-sanoat palatasining “Savdo uyi” korxonasi direktori Serdar Kepbanov Doha shahrida Qatar palatasining ma’muriy-moliyaviy masalalar bo‘yicha direktori Husian Yusef Al Abdulg‘ani bilan uchrashdi.
Tomonlar savdo-sanoat hamkorligini kengaytirish, ikki mamlakat ishbilarmonlarini ittifoq va sheriklik munosabatlariga undash yo‘llarini muhokama qildi.
Mutaxassislarning “Daryo”ga ma’lum qilishicha, Ashxobod 2015-yil dekabrida qurilishi boshlangan Turkmaniston—Afg‘oniston—Pokiston—Hindiston (TAPI) gaz quvuri loyihasini amalga oshirishda Qatarning yirik moliyaviy va sarmoyaviy tuzilmalari ishtirok etishidan manfaatdor.
2011-yilda Doha O‘zbekiston—Turkmaniston—Eron—Ummon—Qatar tranzit-transport koridorini shakllantirish bo‘yicha Ashxobod bitimini imzoladi. Ushbu loyiha Markaziy Osiyo mamlakatlari bilan Fors va Ummon ko‘rfazlari portlari o‘rtasida barqaror aloqa o‘rnatishga qaratilgan.
Turkmaniston hukumati avvalroq “Al Qamra Holding” bilan mahalliy bozordagi potensial loyihalarni moliyalashtirish bo‘yicha o‘zaro anglashuv memorandumini imzolagandi.
Aziz Boyarov
