Ukraina Rossiyaning FAB-500 bombalarini urib tushirish deyarli imkonsiz ekanini ma’lum qildi
Rossiyaning FAB-500 bombalarini urib tushirish deyarli mumkin emas, dedi Ukraina Harbiy-havo kuchlari vakili Yuriy Ignat Washington Post nashriga bergan intervyusida.
“Nazariy jihatdan, bu bombalarga qarshilik ko‘rsatish mumkin, ammo ularni urib tushirish juda qiyin. Deyarli imkonsiz”, — dedi u.
Yuriy Ignatning so‘zlariga ko‘ra, yagona amaliy yechim bombalarga emas, samolyotlarga qarata o‘q uzishdir. Biroq buning uchun zamonaviy qiruvchi samolyotlar kerak.
“Bizda aviatsiyaning yetishmasligi jangga zarar yetkazmoqda. Biz juda qiynalyapmiz”, — deya havo razvedka batalyonining ukrainalik askari Aleksandr Solonkodan iqtibos keltiradi nashr.
Harbiy ekspert, “Arsenal Otechestva” jurnali muharriri Aleksey Leonkovning “RIA Novosti”ga tushuntirishicha, rejalangan bombalarning qo‘llanilishi Ukraina Qurolli kuchlari uchun jiddiy muammoga aylangan. Uning so‘zlariga ko‘ra, butun front chizig‘i bo‘ylab rus qo‘shinlari FAB-500 tipidagi bombalardan faol foydalanishni boshladilar. Bu Rossiya harbiylariga Ukraina havo mudofaasi ta'sir doirasidan tashqarida turib harakat qilish imkonini bermoqda.
