Xitoy armiyasining 68 ta jangovar samolyoti Tayvan oroliga yaqinlashdi

Tayvan Mudofaa vazirligi o‘zining kundalik hisobotida so‘nggi 24 soat ichida Tayvan bo‘g‘ozida Xitoy armiyasining 68 ta jangovar samolyoti va 10 ta harbiy kemasini aniqlaganini ma’lum qildi. Bu haqda “Kommersant” xabar berdi.

Mudofaa vazirligi ma’lumotlariga ko‘ra, ushbu samolyotlarning 40 tasi Tayvan bo‘g‘ozini “o‘rta chiziq” bo‘ylab kesib o‘tgan va Tayvan havo mudofaasini aniqlash zonasiga kirgan. Bunga javoban Tayvan vaziyatni kuzatish uchun havo va dengiz patrullarini yuborgan, shuningdek, raketa tizimlarini joylashtirgan.

• 13-sentabr kuni Tayvan mudofaa vazirligi orolga yaqinlashayotgan 27 ta samolyot va 13 ta kemani qayd etgan.
• 19-avgust kuni Xitoy armiyasi havo kuchlari va dengiz floti Tayvan yaqinida o‘quv mashg‘ulotlari va patrul xizmatini o‘tkazgan. Xitoy harbiylarining aytishicha, bu manyovrlar Tayvan mustaqilligini qo‘llab-quvvatlayotgan va “tashqi kuchlar bilan til biriktirib, provokatsiya qiladigan” “bo‘lginchi kuchlar uchun jiddiy ogohlantirish” bo‘lishi kerak.