Shoygu Kim Chen Inga Ukrainaga zarba berishda qo‘llanayotgan raketalarni ko‘rsatdi (foto)

Rossiyada tashrif bilan bo‘lib turgan KXDR raisi Kim Chen In Vladivostokdagi Knevichi aerodromiga bordi. Unga Rossiya mudofaa vaziri Sergey Shoygu hamrohlik qildi.

Shoygu Kim Chen Inga strategik samolyotlar, qiruvchi samolyotlar va Rossiya harbiylari Ukrainaga hujum qilishda qo‘llayotgan “Kinjal” raketa tizimini namoyish qildi.

Shundan so‘ng, Mudofaa vazirligi maʼlumotlariga ko‘ra, Kim Chen In va Shoygu Vladivostokdagi Tinch okean flotining “Marshal Shaposhnikov” fregatiga keldi, u yerda KXDR yetakchisiga “Uran” kemaga qarshi raketa komplekslari va “Kalibr” universal qanotli raketa tizimlari ko‘rsatildi.

Kim Chen Inning Rossiyaga safari uning oxirgi to‘rt yil ichida xorijiy davlatga amalga oshirgan ilk rasmiy tashrifi hisoblanadi. 13-sentabr kuni Shimoliy Koreya yetakchisi “Vostochniy” kosmodromiga tashrif buyurib, u yerda Rossiya prezidenti Vladimir Putin bilan muzokara o‘tkazgandi.  Shimoliy Koreyaning Koreya davlat markaziy axborot agentligi (KCNA) xabar berishicha, Kim Chen In Putinni Shimoliy Koreyaga taklif qilgan, Putin esa “taklifni mamnuniyat bilan qabul qilgan”.

G‘arb razvedka xizmatlariga ko‘ra, Rossiya va Shimoliy Koreya Rossiya armiyasi Ukrainadagi urushda qo‘llashi mumkin bo‘lgan qurol-yarog‘larni yetkazib berish bo‘yicha faol muzokaralar olib bormoqda. Iyul oyida Shoygu KXDRga rasmiy tashrif bilan bordi. AQSH razvedkasi ushbu safarni muzokaralarga tayyorgarlik sifatida baholadi.