O‘zbekistonda paxta narxi talab va taklif hamda tomonlar kelishuvi asosida belgilanadi

O‘zbekistonda paxta xomashyosi narxi talab va taklifdan kelib chiqib tomonlar kelishuvi asosida belgilanadi, deb xabar bermoqda O‘zA.

Qayd etilishicha, paxta xomashyosining narxi bozor iqtisodiyoti talablariga muvofiq, har bir hududda o‘sha hududdagi yerning holati, paxta yetishtirishga yo‘naltirilgan sarf-xarajatlar, bozordagi talab va taklifdan kelib chiqib, bevosita oluvchi va sotuvchi tomonlarning o‘zaro kelishuvi asosida belgilanadi.

Eslatib o‘tamiz, avvalroq O‘zbekistonda paxta terimi uchun yangi to‘lov narxlari e’lon qilingani, unda 1 kilogramm paxta uchun birinchi terimda 2100 so‘mdan, ikkinchi terimda 2600 so‘mdan kam bo‘lmagan miqdorda haq to‘lanishi belgilangani haqidagi xabarlar tarqalgandi.

Qishloq xo‘jaligi vazirligi bunday xabarlar asossiz ekanini ma’lum qilib, ayni kunlarda paxta terimiga narx belgilash bo‘yicha ishlar vazirliklar bilan kelishuv jarayonidaligini bildirgandi.

“Ayni kunlarda paxta terimiga narx belgilash bo‘yicha ishlar vazirliklar bilan kelishuv jarayonida. Bunda uning birinchi va ikkinchi terimi uchun (navlarini hisobga olib) qancha narx belgilanishi aniq ko‘rsatiladi”, — deyilgandi xabarda.