Qozog‘istonda singlisini fohishalikka majburlagan o‘zbekistonlik ayol ushlandi 

Qozog‘istonning Atirau viloyatida 1998-yilda tug‘ilgan singlisini fohishalikka jalb qilgan O‘zbekiston fuqarosi aniqlandi. Bu haqda Polisia.kz xabar berdi.

O‘zbekistonlik ayol uyushgan jinoyatchilikka qarshi kurashish boshqarmasi xodimlari tomonidan ushlangan. U 2021-yil may oyida jabrlanuvchini oziq-ovqat do‘koniga sotuvchi bo‘lib ishga taklif qilib, Toshkentdan Chimkentga, so‘ngra Atirauga olib kelgan.

Ammo u kelganidan keyin hujjatlarini olib, jismoniy zo‘ravonlik ishlatib, fohishalikka majburlagan. Mazkur holat Jinoyat kodeksining 308-moddasi (fohishalik bilan shug‘ullanishga jalb etish) bilan qayd etilib, tergov harakatlari olib borilmoqda.