“AQSH yordamisiz Ukraina urushda yutqazadi” — Zelenskiy
Ukraina prezidenti Vladimir Zelenskiy AQSH Kongressida respublikachi tanqidchilar bilan uchrashar ekan, agar milliardlab dollarlik yordam oqimi kesilsa, Kiyev urushda yutqazishidan ogohlantirdi. Bu haqda CNN xabar berdi.
Demokratik senat yetakchisi, prezident Jo Baydenning Ukrainaparast siyosatining yetakchi tarafdori Chak Shumerning aytishicha, Zelenskiy unga “agar yordam olmasak, urushda yutqazamiz”, deb aytgan.
2022-yil fevralida AQSH G‘arbning Ukrainani qo‘llab-quvvatlashiga boshchilik qildi, Kongress shu kungacha 100 milliard dollardan ortiq yordam, jumladan, 43 milliard dollarlik qurol-yarog‘ berishni maʼqullagan.
Ammo Respublikachilar partiyasida hukmronlik qilayotgan o‘ng qanot fraksiya yordamni to‘xtatish kerakligi haqida gapirmoqda. Senatdagi ozchiliklar yetakchisi Mitch Makkonnell esa AQSHning Ukrainaga yordamini himoya qilgan.
“Amerikaning Ukrainani qo‘llab-quvvatlashi xayriya emas. Bu to‘g‘ridan-to‘g‘ri manfaatlarimiz uchun qilingan sarmoyadir. Rossiyaning harbiy qudratini pasaytirish bizning asosiy strategik raqibimiz Xitoyni to‘xtatishga yordam beradi”, — degan u.
Zelenskiy Vashingtonga kelganida “muhim muzokaralar” kutayotgani va “Ukraina uchun havo mudofaasi eng muhim masalalardan biri ekanini” aytgan. Bu uning urush davridagi Kongressga ikkinchi tashrifi, tashrif davomida u Pentagonga borishi, Oq uyda Bayden bilan uchrashishi kutilmoqda.
