Samarqandda davlat zaxirasi bo‘lgan 1 gektar yerni 150 ming dollarga olib berishni va’da qilgan shaxs ushlandi
Davlat xavfsizlik xizmati xodimlari tomonidan Samarqand, Surxondaryo va Andijon viloyatlarida noqonuniy yer savdolariga chek qo‘yildi.
Xususan, DXXning Samarqand viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda tezkor tadbir o‘tkazilgan. Tadbirda Kattaqo‘rg‘on tumanida yashovchi 56 yoshli fuqaro issiqxona qurmoqchi bo‘lgan shaxsning ishonchiga kirib, unga davlat zaxirasida bo‘lgan 1 gektar yer maydonini 150 ming dollar evaziga mansabdor tanishlari imkoniyatlari orqali olib berishni va’da qilgani anqilangan.
Shuningdek, u 9 ming dollar evaziga ushbu yerni kadastr tizimidagi tanishlari yordamida uning nomiga rasmiylashtirib berishini aytib, jami 159 ming dollar olgan vaqtida ashyoviy dalillar bilan ushlangan.
Paxtachi tumanida kuzatilgan holatda esa 41 yoshli shaxs o‘z onasiga tegishli bo‘lgan fermer xo‘jalikning 10,45 gektar yer maydonini mevani qayta ishlash zavodi qurmoqchi bo‘lgan tadbirkorga 900 million so‘mga sotishga kelishib, oldindan 13 ming dollar olgan vaqtida qo‘lga olingan.
Bundan tashqari, DXX Surxondaryo viloyati bo‘yicha boshqarmasi hamda Bosh prokuratura huzuridagi departamentning hududiy boshqarmasi bilan hamkorlikda tezkor tadbir o‘tkazilgan. Tadbirda Sho‘rchi tumanidagi bog‘dorchilikka ixtisoslashgan fermer xo‘jalikda ishchi bo‘lib faoliyat yurituvchi, muqaddam sudlangan shaxs mazkur xo‘jalikning 50 sotix yer maydonini xaridorga 45 ming dollariga sotishga kelishib, 40 ming dollar olganvaqtida ushlangan.
Andijon viloyatida o‘tkazilgan tezkor tadbirda esa Asaka tumanida yashovchi shaxs bog‘dorchilikka ixtisoslashgan fermer xo‘jalikka tegishli 24 sotix yerni xaridorga kelgusida turar-joy qurish uchun hujjatlarini rasmiylashtirib berish bilan 22,5 ming dollarga sotgan vaqtida ushlangan.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Noqonuniy yer savdolari
Avgust oyida Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi. Aprel boshlarida esa Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgandi.