Ukraina Kurskdagi federal xavfsizlik xizmati qarorgohiga dron uchirdi (video) 

Ukraina Mudofaa vazirligining Bosh razvedka boshqarmasi Kurskda operatsiya o‘tkazib, ikkita nishonga — shahar markazidagi Federal xavfsizlik xizmati (FXX) qarorgohiga va aerodrom yaqinidagi neftni qayta ishlash zavodiga hujum qildi. Bu haqda “Ukrainskaya pravda” xabar berdi.

Ma’lum qilinishicha, birinchi holatda dron binoga to‘g‘ridan-to‘g‘ri zarba bergan, ikkinchisida esa yong‘in boshlangan. Vayronagarchilik va qurbonlar ko‘lami haqida hozircha aniq ma’lumot yo‘q.

• 24-sentyabr kuni Kursk viloyati gubernatori Roman Starovoyt Kurskning markaziy tumanida Ukraina uchuvchisiz samolyoti maʼmuriy binoga hujum qilib, uning tomini biroz shikastlagani haqida xabar bergandi.

• Amaldor gap qaysi obyekt haqida ketayotganiga aniqlik kiritmagan, biroq videoni tahlil qilgan jurnalistlar hujum FXX viloyat boshqarmasi binosiga bo'lgan degan xulosaga kelgan.
• 24-sentyabr kuni Kursk shahar kunini nishonlaydi. Rasmiylar Kurskning 991 yilligi sharafiga o'tkaziladigan bayramlarni bekor qilmasliklarini aytgan.