Aydar-Arnasoy ko‘llar tizimida suv zaxirasi qanchaga pasaygani ma’lum qilindi
O‘zbekistonda Aydar-Arnasoy ko‘llar tizimiga quyiladigan suv hajmi yildan yilga kamayib, suv zaxirasi 49,2 milliard kubometrdan 36 milliard kubometrga pasaydi. Bu Bosh prokuratura va Ekologiya, atrof-muhitni muhofaza qilish va iqlim o‘zgarishi vazirligi xodimlari hamkorligida o‘tkazilgan o‘rganish natijalarida aniqlandi.
Ma’lum qilishicha, 11—15-sentyabr kunlari daryolar o‘zanlarini tozalash va qirg‘oqlarini mustahkamlash, noruda foydali qazilmalarni qazib olish ishlarining noqonuniy amalga oshirilishiga yo‘l qo‘ymaslik, atrof-muhitga salbiy ta’sirining oldini olish, shuningdek, transport va gidrotexnika infratuzilma obyektlarining xavfsiz ishlashini ta’minlash maqsadida Jizzax viloyatining Forish, Zomin, Sharof Rashidov, Yangiobod tumanlarida yerosti suvlariga quduq burg‘ilash va ulardan foydalanish bo‘yicha moratoriy joriy qilingani, yerosti suvlari sathi pasayib ketayotgani hamda Sangzar daryosida o‘zanlarni tozalash va qirg‘oqlarini mustahkamlash ishlari ahvoli o‘rganildi.
O‘rganishlar davomida Aydar-Arnasoy ko‘llar tizimida suvning sho‘rlanish darajasi 10-11 foizga oshishi natijasida tabiiy parlanish va cho‘llashishning keskin oshgani, Ramsar konvensiyasiga kiritilgan “Tuzkon” bo‘limidagi 63,3 ming gektar maydondagi “Arnasoy” ornitologik qo‘riqxonasining flora va faunasiga salbiy ta’sir qilayotgani ham aniqlandi.
O‘rganishlar natijasi bo‘yicha 27 ta noqonuniy qurilmalarni buzish bo‘yicha sud qarorlarining ijrosi ta’minlanib, ekologiya boshqarmasining 114,5 million so‘mlik debitor qarzdorligi undirildi.
Yerosti suvlaridan foydalanish uchun quduq burg‘ilash va ulardan foydalanish qoidalarini buzgan 9 nafar shaxsga nisbatan ma’muriy huquqbuzarlikka doir ish qo‘zg‘atildi hamda Aydar-Arnasoy ko‘llar tizimida noqonuniy ov qilgan huquqbuzarlardan 135,4 million so‘m jarima undirilib, 25,7 million so‘mlik da’vo arizasi kiritildi.
