Ukraina energetika obyektlariga qilingan hujumlarga “jiddiy javob qaytarishga” va’da berdi 

Ukraina Xavfsizlik xizmati Kursk viloyatining Snagost qishlog‘idagi elektr podstansiyasiga dron hujumini amalga oshirdi. Bu haqda Ukraina razvedkasiga tayanib, “Ukrainskaya pravda” xabar berdi.

26-sentyabr kuni ertalab Kursk viloyati gubernatori Roman Starovoyt Snagostadagi podstansiyaga qilingan hujum tufayli yettita aholi punkti elektr ta’minotisiz qolganini aytdi. Ukrainalik jurnalistlarning razvedkadagi suhbatdoshiga ko‘ra, mazkur hujum SBU maxsus operatsiyalari yangi bosqichga ko‘tarilayotganini bildiradi.

“Ruslar tushunishi kerak, agar ular Ukraina energetika obyektlariga hujum qilishda davom etsa, bunga jiddiy javob olishadi. Bizning resurslarimiz buni amalga oshirish imkonini beradi”, — dedi manba.

• 2022-yil oktyabr oyidan beri Rossiya Ukrainadagi muhim infratuzilma obyektlariga bir qator raketa hujumlarini amalga oshirib, mamlakat energetika tizimini qish mavsumi oldidan o‘chirib qo‘yishga urindi.
• Ukraina rasmiylariga ko‘ra, mamlakatdagi elektr stansiyalarining uchdan biridan ko‘prog‘i vayron bo‘lgan. Ukraina Qurolli kuchlari 2023-2024-yillar qishida Rossiya armiyasi yana Ukraina energetika tizimiga hujumga o‘tishini istisno qilmadi. 2023-yil sentyabr oyida Rossiya Ukraina energetika infratuzilmasi obyektlariga zarbalar berdi.