Markaziy va Janubiy Osiyo davlatlari bosh shtab boshliqlari Toshkentda uchrashdi
Toshkentda 27-sentyabr kuni Markaziy va Janubiy Osiyo davlatlari bosh shtab boshliqlari konferensiyasi bo‘lib o‘tdi, deb xabar bermoqda Mudofaa vazirligi matbuot xizmati.
Ma’lum qilinishicha, unda AQSH, Pokiston, Turkmaniston, Qozog‘iston, Qirg‘iziston, Tojikiston va O‘zbekiston Mudofaa vazirliklari delegatsiyalari ishtirok etdi.
Tadbir avvalida harbiy delegatsiyalar vakillari “G‘alaba bog‘i” yodgorlik majmuasidagi “Matonat madhiyasi” monumenti poyiga gulchambarlar qo‘yib, “Shon-sharaf” muzeyini ko‘zdan kechirdi. Shundan so‘ng “O‘zbekiston” xalqaro forumlar saroyida o‘z davlat bayroqlari oldida suratga tushdi.
Konferensiyani O‘zbekiston mudofaa vaziri general-leytenant Bahodir Qurbonov hamda AQSH Qurolli kuchlari Markaziy qo‘mondonligi qo‘mondoni general Maykl Kurilla kirish so‘zlari bilan ochib berdi.
Konferensiya doirasida mintaqaviy xavfsizlik, terrorizmga qarshi kurash, gumanitar yordam va mintaqaviy barqarorlik kabi masalalar ko‘rib chiqildi.
