Toshkentda isitish magistralidagi nosozliklar sabab ayrim hududlarda issiq suv ta’minoti vaqtincha to‘xtatiladi
Toshkent shahrining ayrim tumanlari hududida issiq suv taʼminoti vaqtincha to‘xtatiladi. Bu haqda Veolia Energy Tashkent xabar berdi.
Isitish magistralidagi nosozliklarni bartaraf etish va tegishli jihozlarni almashtirish bo‘yicha avariyaviy taʼmirlash ishlarini olib borish sababli bugun, 27-sentyabr kuni quyidagi manzillarda issiq suv taʼminoti vaqtincha to‘xtatiladi:
- Chilonzor tumani — K. Sharq, Guliston va Algoritm dahalari;
- Uchtepa tumani — Izza, Eshonguzar dahalari, 30 va 31-mavzelar.
Qayd etilishicha, issiq suv taʼminoti favqulodda taʼmirlash ishlari tugashi bilanoq tiklanadi.
“Veolia Energy Tashkent MCHJ XK vaqtinchalik noqulayliklar uchun oldindan uzr so‘raydi va issiq suv taʼminotini tezroq tiklash uchun barcha zarur choralarni ko‘radi”, — deyiladi xabarda.
Avvalroq Bektemir va Uchtepa tumanlarida tabiiy gaz yetkazib berish, shuningdek, Sergeli va Bektemir tumanlarida elektr energiyasi ta’minoti vaqtincha to‘xtatilishi to‘g‘risida xabar berilgandi.
