Kichik Robert Kennedi Ukrainadagi urushni 100 kun ichida tugatishga va’da berdi
AQSH prezidentligiga nomzod kichik Robert Kennedi agar saylansa, Ukrainadagi urushga 100 kun ichida barham berishini aytdi, bu haqda u o‘zining X (sobiq Twitter) akkauntida yozdi.
U urush “hamma kutganidan ham yaxshiroq shartlar bilan” yakunlanishiga ishontirdi.
Kichik Robert Kennedi 69 yoshda. U 1965—1968-yillarda Nyu-York shtatidan senator va AQSHning sobiq Bosh prokurori (1961—1964) bo‘lgan Robert Kennedining o‘g‘li. Katta Robert Kennedi esa 1963-yilda Dallasda otib o‘ldirilgan AQSH sobiq prezidenti Jon Kennedining ukasi. Akasi kabi Robert Kennedi ham saylovoldi kampaniyasi paytida otib o‘ldirilgan.
Kichik Robert Kennedi huquqshunos va atrof-muhit faoli. U shuningdek, koronavirusga qarshi vaksinatsiya haqidagi fikrlari bilan ham tanilgan. Kennedi emlashga qarshi chiqqan va AQSH rasmiylarining pandemiyaga qarshi kurashdagi harakatlarini bir necha bor tanqid qilgan, deb yozadi CNN.
U 6-aprel kuni Demokratik partiyadan nomzod sifatida prezidentlik saylovlarida ishtirok etish uchun ariza berdi.
Siyosatchi Ukrainadagi harbiy amaliyotlar va Rossiya bilan munosabatlari haqida avval ham bir necha bor gapirgan. Xususan, aprel oyida u Moskva va Kiyev o‘rtasidagi urushni Qo‘shma Shtatlar uchun katta muammo deb atagandi, chunki bu Rossiya va Xitoy o‘rtasidagi yaqinlashuvni tezlashtiradi, bu esa Vashington uchun eng yomon natijadir. Iyul oyining oxirida kichik Kennedi Rossiya bilan “ekzistensial jang”dan ogohlantirib, Moskvada yirik yadroviy qurol zaxirasi borligini eslatdi.
